People :)

ide mitti d audrey, rechts d garim 🙂garim isch iversüchtig uf mis glaceee.. (si isch uf diät :D)

nebet mir s schwiizer pärli, ramona und silvan und unedra d giulia.. und ide mitti d ama mit rotem chopf 😀

Okey, ich bin ja bekannt defür dass ich mich ab ganz chline, ganz unnötige sache meeeega chan ufrege will mich das so wahnsinnig macht.. zB wenn öbber mit de negel so grüsch macht (hihi päsc).. oder wenn öbber schmatzt…
oooder zB wenn öbber d finger knackst.

sinder schomal 1.5 fucking stund nebet öbberem gsässe wo, nöd übertribe (!!!) jedi 8sek (i has zetl)  mit sim blöde grosse zeche knackst? und nöd eso dasese bizeli tönt het, sondern so richtig luut! dasmers vom andere ändi vom ruum no guet wür ghöre.
ich han gad mit mine hostfamily agfange ‘the blind side’ (suuper film!) z luege.. und de cassius wo nebet mir sitzt isch di ganz zit am knackse gsi, immer! und wenn ich mich so ufrege über öbbis denn chan ich igendwenn nüm aständig säge er söll doch ufhöre, will mer mir das so fest amerkt das ich mich ufrege.. und uf englisch (und vorde ganze familie wenns ruhig isch) chan ich das sowieso nöd überebringe..

aaaaaa das macht mi richtig aggresiv… grrrr… jetz ischmers uf jede fall voll usghänkt und i ha zmitzt im film gseit ich göng god husi fertig mache damiti mer das blöde knackse nüm mun alose und ez versuechi mich abzrege.

und ez nö öbbis bizeli erfreulichers vom tag:

han ja mal churz erwähnt dasichs ide schuel toooodlangwilig finde.. aso scho nöd so schlimm, aber bin scho biz unterforderet.. han denn uf jede fall mal am mäntig mit de lehrerin vom namittag (s isch nöd so min fan willi aml biz demotiviert bin willi eifach fast ischlofe) gredet und si gfragt ob ich echt nöd chönti s advanced probiere.. und denn het si gfunde nei, ich segi nanig parat für das… a ja, das het si mir gseit nachdem ich 85% richtig gha han bim readingtest und mit über 80 hetti mer s advanced.. hani gfunde ja, oke, sorry, voll peinlich dasi gfragt han.. und denn jetz bini amel fast igschlofe ide schuel.. ich mein was han ich füre motivation z lerne? s first bestahni ja e scho nach dene test wo mir bis ez glöst hend, und ob ich ez s A oder s C han, das interessiert niiemer! obs first oder s advanced hesch, das interessiert d lüüt..
und hüt bzw morn isch de letscht termin zum sich fürs advanced azmelde.. und denn hani mit de morgeklass-lehrerin gredet und si het gfunde dases s schlimmste seg wennmer glangwilet isch, wenni will chöng ichs advanced probiere..  uf jede fall machi jetz glaub no s advanced denebet, oder bessergseit i probiers eifach damiti en grund gsehene werum ich überhaupt sötti lerne :))

o und d pubnight am mittwuch isch wieder mal legendär gsi.. ich gohn jedes mal ded ane und finde ich trink 1 bier und gange denn hei.. und jedes mal gsehnis garnüme.. d audrey vo minere klass (18ni, vo new caledonia, si isch unedra ufeme foti) het mich gfragt ob ich mit ihre tequilla shote.. ich meine, werum nid? 😀 am schluss hani 9shots gha und ich bin de meister gsi im englisch, i glaub so guet hani no nie gredet.. bin denn nachde pubnight (wo ja scho am 5i afangt) am 11i no zum sultan mit de hinatea (si vo tahiti, si isch voll cool). de sultan isch e sonen saudi-arabische scheich wo glaub bizeli z viel geld het, er läbt (ja, LÄBT) uf jede fall im türste hotel zmitzt ide stadt und het eigli immer homepartys dede. isch no interessant gsi bizeli mit ihm z schwätze, er wot uf jede fall nume 1 frau, ned mehreri… da bini schono beruhigt ^^

ich hange nachäne gad no es paar fotis a.. au vo coromandel. coromandel isch sooo schön!!
mini gsellschaft isch zwar bizeli ‘dämlich’ gsi.. han mi bizeli über si ufgregt.. die type wo nur mitere frau chönd rede wennsi interesse a ihre hend (dh nöd vergeh isch.. ups, ja da bini) sind ja scho bizeli blöd. und s beste dra isch das d nicole au vergeh isch, nur seit sis de jungs nöd, im gegesatz zu mier. das isch echti liebi 😉
han denn uf jede fall es grooosses 2 ufem rugge gha, will mich chanmer ja nüme is bett kriege. he was gits nume für männer, das isch ja unglaublich! han mich ganz schön tüscht i dene beidne 😀 aber zum glück gits no gaaaaanz viel anderi cooli lüüt da :))) am fritig bis am mäntig obig (mäntig isch da en fiirtig) bini ufem bay of island trip.. dasmal nimmi di gueti kamera vom papi mit (daaanke papi! :)) und denn gits bizeli professionelleri fotiis..

a ja und i coromandel hemmer no sone gruppe vo iheimische, aso riiichtige neuseeländer kenneglernt, sind de ganz samstig obig mit ihne gsi und s isch echt super gsii! :))

17. Januar

Hooiiiiiiiii :))

Hender schomal e Person kenneglernt wo eifach soooo herzig isch dasd si am liebste bi allem würsch filme? 😀
Bin hüt mit de Garim, de Koranerin usde Klass und em Kevin, go zmittag esse gange ines Japanisches Resti… und d Garim isch ja so süess! si chan nöd eifach normal mit eim rede und esse.. sondern weretem esse wennsi was gseit het hettsi immer ihri händ uf mini bei klöpft: ioooaaaaaaa? mit riesige auge 😀 und wennsi öbbis verzellt denn hett si sich immer a min arm klammeret, als wär si mega nervös.. denn hani wöle vo ihrem esse probiere, hani zerst eifach bizeli vo ihrem riis gno… stecktsimer eifach mit ihrne stäbli no es riese stück rohe fisch is muul ^^ ha garnid gwüsst dass koreaner so berüehrfründlich sind… ‘in korea darf mer s esse nöd abbisse, da steckschder eifach s ganze riese stück is muul ine’ haha, s resti isch vo minute zu minute leerer worde und mir hend es riese Fest gha :))
S isch übrigends s 1. mal gsi sit 2 wuche wo sie wieder öbbis normals go esse cho isch, si isch nämli uf Diät (was si nöd nötig hetti) und isst jede mittag nume Banane oder Gmües 😀 und wennd zrugg chunsch vom mittag fragt si dich immer mit riesige auge wasi gässe han.. wennd ihre denn mal seisch pizza denn rastet si voll us, ooooooooaaaaa piizza??? :O :O foto foto?
Ich glaub i mun am Kevin mal sege er söll si Filme 😀

Apropo Diät, ich bin ufere Bier-Diät oder sowas ähnlichem.. ide letschte paar Täg isch bi üs all-day-pub-night agseit gsi, das isch ja no schlimmer da une wie mer seit! Ich stahne am morge am halb 8ti uf, gange id Schule und denn gömmer ämel no id Bibliothek gschnell d Husi go mache oder so und denn sitzemer ines Pub und trinket 1,2 Bierli.. und denn chunsch igendwenn 11i oder 12i hei und igendwie merksch denn dassd no garkei znacht gesse hesch.. han so scho 2 kilo abgno :O münd luege, i chume denn zrugg mit stäckli-bei und eme bierbuuch 😀

A und am Mittwuch isch wieder die bekannti Pub-night gsi.. ich bin eigentlich ziiiemlich unmotivert gsi, han denkt i gang ez gschwind verbi und denn inere stund wieder hei.. denn bini ad theke gstande mitem kevin (er het scho paar bier gha ^^) und denn bstellter 3 Shots.. ich han mir doch nüt debi überleit, ha denkt das seg für öbber am tisch.. ‘ja nemmemr d shots gad gschwind da’ waas? 😀 und denn hetts halt agfange und us 1 shot sind es paar shot’s worde und igendwenn am 1 hani denn müse mitem taxi hei (was nedmal so tüür isch) willi d zit völlig vergesse han und min letschte bus scho langlang vorher gfahre isch. (aso checkt hanis schon) und am donnstig morge stasch uf, immerno bizeli trümmlig und merksch dasd no söttisch 6siite husi mache, uii nei.. 😀

Wer vo eu Frozen nanig gse het (Die Eisprinzessin oder sowas uf dütsch) muesen imfa uuuumbedingt go luege! Zur abwächslig simmer denn am Donnstig abig is kino will niemer me lust gha het uf bier.. de film isch super süess! si singet zwar am afang recht viel, da isch bizeli komisch, aber macht mega spass.. und mer verstohts sogar uf englisch :))
und nachem kino findet d jungs ‘und ez, gömmer no eis go näh?’, haha, wotsch mi verarsche 😀 aber zum glück gits da au so feini Beeri-Cider und nöd nur Bier..

 

Ich gang ez go packe, i gang morn mit em Cédi, Jonas und de Nicole uf Coromandel mit de Fähri und denn blibemer dete überd Nacht.. münds mal go google, gseht sooo schön us!
Ihr chönd eu garnid vorstelle wie kompliziert das gsi isch bis mer üs mal geinigt hend.. d Nicole und ich gebet üs mitem Nötigste ab, di andere 2 hend uf es Luxus-Hotel bestande, sus wänds nöd mitcho.. ja super 😀 Das sind echti Divas, nimmt mi wunder wie das usechunt..

Schös Wucheend :))

 

Und ich vermiss eu imfa bizli, au wenns da super isch bis ez..

 

PS: de neusti Tratsch, wenni scho de link nur eu gibe.. d Severina hängts ez nüme mit üs sondern entweder mitem Werner (Buur) wosi au scho go pfüsele isch.. (si hend ja nöd beidi en Fründ/-in.. super macheter das!) und wennsi nöd mitem Werner hängt denn mitem andere wo si es techtel-gmechtel het.. nöd de besti start für ihres image 😉

12. Januar

Wauw, es isch scho e gaaanzi Wuche vergange! Bi mir isch jetz Sunntig obig und ich bin de ganzi Tag nume ‚diheime‘ umeghängt und han trotzdem nüt ufd Reihe kriegt. Aso villicht muni vo ganz vorne Afange und ich bin mich gad innerlich am entscheide ob das en Blog söll werde wo au dörfet mini Lüüt da vo Neuseeland läse oder nöd. Aber ich glaube ich gib de Link nur eu use wo nüt mit dem Blog ztue hend, sus chani nämmlich nöd lästere 😀

Ich bin am Mäntig i dere Schuel acho wie sones verschupfts Meitli willi zerst mal d Schuel nöd gfunde han und denn z spoot cho bin.. denn hemmer de ganz morge sone ifüehrig gha und chlini Tests und so.. mit ziemli guete Resultat bini denn uf jede fall id First-Klass cho (en Advanced-Klass gits leider nöd).

Und es isch Krass! Mir hend 36 Neuitritt gha (öbbe) und 13 devo sind Schwiizer. De einti devo de Werner, das isch en 25 Jährige Buur wo eigli no ziemli guet usgseht und auned so wie en Buur umelauft zum glück. Aber Englisch redeter trotzdem wie en Buur. Denn hemmer müse en Test usfülle, alli sind Ruhig das am löse, denn schreit er plötzlich in Ruum: ‘Chan mir mal öbber cho hälfä? Ich chuma nöd druus!‘ und döte hemmer nani gwüsst dasses so vill Schwiizer het.. und denn bim Hör-test het e Frau das ganze erklärt, zimli schnell halt. Denn wäris los gange und er rüeft eifach: ‚Het öbber igendöbbis verstande? Aso ich chume nöd drus!‘ und luegt eso ume. Denn womer mit dem nebetdra hend müse rede, nebet ihm es herzigs dünns Meitli wo 18ni isch, denn hemmer sone Vorlag gha: My name is ___ and I come from ___ . Denn het si gfunde si chämi vo New Caledonia. Und er: ‚From whaaat??‘ si gheit fast hine use willers so grob gseit het 😀  😀 denn hettsi erklärt igendwie that’s an island 3 houers away from here. und er: ‚A whaaat?‘ willer nöd ma gwüsst het das ‚island‘ heisst. Ja, so isches uf jede Fall witer gange mit ihm, mir lachet üs jedes mal en schade ab ihm und sim englisch. Das isch er vor es paar Jahr.

 

 

Ich bin denn uf jede Fall am Nami mal i mini Klass cho, 5 vo 12 sind Schwiizer.. De einti isch de Oliver (21), das isch e sonen typische Schwiizer-Erwachsnig, er isch en riiiise Fuessball fan. aso en u Liebe. denn hemmer d Severina (19), di isch au voll de Fuessballfan und nöd würkli mini Wellelängi.. si isch so voll das Mannsweib wo mit Fraue garnüt chan afange.. aso i has scho guet mit ihre, aber si isch zum Teil aunöd so würkli min Fall.. aso ide Schwiz würis niiie mit ihre hänge. Und denn isch no de Kevin (26), er isch so biz e ‚massivi‘ person, gseht am grosse Pädi usem N ei klass über üs meega ähnlich. Er het so langi Haar und liiebt Jägermeister.. ihn hani u gern, er isch en coole.. und di 5ti schwizerin isch d Barbara (igendwie 35gi) mit so churze Blonde Haar wo meega erwachse isch und immer am rüebli oder nüssli knabbere, extra vo dihei mitgno.. find si bizeli e blödi.. defür hemmer e meeega herzigi Koreanerin, d Garim (21), si isch sone typischi Asiatin, wo d Händ vorem Muul het wennsi lacht und immer so das komische Asiate-Grüsch‚Joooooaaaaaa‘ macht so quitschig 😀 mit ihre duni amel bizeli englisch rede.. aber eigli verstaht si mich garnöd wennich öbbis sege und ich verstah si au fast nöd und am schluss lachemer eifach immer willmer nöd checket was de ander gmeint het ^^

und denn isch no de Even i üsere Klass, au en Koreaner (24) wo u süess isch.. und es isch soo praktisch will mit dene Koreaner hani voll nüm so Komplex zum Englisch rede, will si chönts aunöd.. da beruhigt mich immer 🙂 Denn hemmer no die 18jährigi, herzigi vo new caledonia i üsere klass, si isch u e hübschi das macht mer hingäge wieder komplex. und d kate, koreanerin isch au sooo schön, die gad au 😀 und ez isch gad sitem fritig no eini vo tahiti cho, di hani aber nani so guet kenneglernt. und de lazlo isch no, en 46 jährige ungarn.. mit ihm hani ade pub-night u lang gredet.. ich find das so krass! di hend frau und chinde diheime und gönd eifach für fast es jahr wäg! ich wür das mega komisch finde wür min maa das wöle mache i dem alter, so bizeli als würets wöle namal jung si und go fraue ufriisse.apropo pub night.. dede hani de lucas kenneglernt, en brasilianer wo 25gi isch und sooo ufdringlich.. er isch verlobt (er het nur gseit e fründin, het aber en ring a) und er het immer gseit ich seg di aaaallerschönsti und blabla.. aber igenwie ischer ebe auno herzig, und vor allem ischer chirurg wenner i 2 jahr sis studium fertig het (surgeon, hani gad glernt vorher :D) und er het mer bilder zeigt vo sine operatione, mega spannend! jäja, er isch aber au recht betrunke gsi glaub, am nägste tag ischer wieder ganz schüch nebet mir im lift gstande.

A ja und ade Pub-night hani denn no di restliche Schwizer kenne glernt und di sind uuuu cool!

Aso di einte sind es Päärli, 22 und 24, sie heisst Ramona und ihm sin Name hani vergesse… das sind u herzigi und voll nöd so verschlosse wie es Pärli halt zum Teil isch. Und denn hani no de Jonas und de Cédric kenneglernt, die sind suuuper! Aso wend mit dene zemebisch lachsch nurna.. De Jonas gseht us wie en typische Schwiizer.. und er isch sozial, abgsehe devo daser nöd chan teile, das hasster über alles. Und er hassts au fremdi Lüüt azlange, aso er chan zum Bispiel nöd amene Asiat d Hand schüttle ohni dasers grüsig findet. und wenner ufde strass lauft denn dörf ihn ja niemer berüehre.. aber s soziale dra isch das di andere meh platz hend zum laufe,will er sich so dünn macht 😀 und er isch mega heikel aso het immer bizeli was umezmötzle.. und er trinkt uuuu gern.. wie de Cédi au, de gseht es bizeli us wie en Schneemah bzw de Tobi Pfister, aber igendwie trotzdem recht hübsch. Er isch e riiiise Tussi, und sis lieblingswort isch ‚Schaafsseckel‘^^ und er findet so dünni, blondi Russine geil mit Absatzschueh.. das verstohni nöd 😀 (und si reget sich töödlich uf abde Severina)

Und de Klaus, en 38Jährige Schwizer wo aber meeega chillig druf isch und ich mich recht guet verstahne isch auno ade Pubnight gsi.. isch uf jede Fall lustig gsi 🙂

Mini Schuel isch imfa no recht sträng! aso mir hend jede tag 1 bis 2.5 stund husi und musch für alles zahle zB wennd fluechsch oder z spot chunsch oder dütsch redsch musch jedes mal zahle und am schluss gits e party us dem geld.. aber ich bin fast es bizeli unterforderet ehrlichgseit.. hend so probetests gha die wuche und i grammatik und reading bini di besti gsi und im schribe au megaguet.. ha nur 8 fehler gha uf 200. das bringi ja nödmal im dütsche ane?! 😀 aber rede isch halt es rechts problem für mich..

 

Aso, fertig Schuel vorgstellt..

Ich han ja verzellt das d Chinde voll distanziert sind, het sich voll gänderet ide letschte Täg.. aso d Kiwa isch immerno eher bizeli uf Abstand, aber de Cassius voll nüme. Ich han mit ihne denn igendwenn the blindfull game gspillt, das isch ja so en schissdreck! aso mir sind im Gang und öbber mues e Augebinde azieh und denn Blind abtaste wo di andere sind. und wermer zerst chan ‚packe‘ de mues nachäne d Klappe azieh und sueche.. 😀 Ich han ihne denn igendwenn Schiitlivertschutis biibracht und si sind sooo begeisteret, vor allem de Cassius. Ich han jetz es fulltimeprogramm mit Spieli spille, ich chan amel chum mini Täsche is Zimmer legge will die beide hend ebe Ferie momentan und drum hends e nüt z tue ussert z spiele. Aber defür hends mer aumal bide Husi ghulfe, das isch mega herzig 🙂 und am Donnstig hends mi gfragt obi wöll mitcho go laufe und ihri neue Schueh usprobiere.. ja, voll ok. Simmer losgloffe, denn ich so alsJoke ‚gömmer aber nöd uf de Berg död äne?‘ Ja genau, uf de laufemer.. waaaas wender mi verarsche?! Mir sind uf jede Fall ufegloffe ca 20min und denn ded obe hets e super ussicht gha plus e so en typ mit sine 2 chline cousins. Denn ischer so zu üs übere cho und het afange rede.. blabla öbmer vill ufe chömet und wie alt ich sege.. denn ischer easy erstuunt gsi, waas du gsehsch jünger us! ich bin extra weg dem cho zum mit dir rede, er seg 16ni.. hani scho gfunde easy, voll komisch.. denn hetter gfragt ob ich mit ihm wöll bizeli go spaziere go und di andere döte la.. so eh neeeeii?! di chline hend uf jede fall nachäne voll de spass gha zum mich weg dem ufzie, uuuuh er mag dich.. ja super ^^ richtig peinlich.. fast so peinlich wie wo de cassius mich hüt gfragt het für was die pilleli seget wo ich da nämi… hani ihm müse erkläre dases defür seg dasmer keis baby bechömi, wie er mich agluegt het hetteter müse gse.. 😀

Aber ich finds trotzdem no bizeli komisch da.. aber ich hoffe das chunt no.

 

Puh scho 11i, sött go pfuuse, wot aber no vom Wucheend verzelle 🙂

Mir hend am Fritig Nami immer frei i üsere Schuel.. zerst simmer go zmittag esse i sone Hüendli-Bude und mer het zwüschet Mild, Scharf und Sehr Scharf chöne uswähle.. ich ha denkt jaaa, Scharf chan nöd schade.. schlecht denkt gsi, ich ha praktisch nüt chöne esse ich bi so am Träne und Nase Schnütze gsi..

denn simmer mitem Werner (Buur), em Klaus, em Kurt (en 45jährige Schwizer), de Severina, em Jonas und Cédric an Strand abe gange.. hemmer uf jede Fall vor gha. Mir sind 5Min an Strand abe und denn hend di erste gfunde si wölet jetz es Bier go trinke.. simmer alli ine Bar, ich fast nüt gesse, ha denkt ich nimm besser es Cola.. denn het de Kurt aber 2 Pitscher spendiert und denn de Werner auno… hani ja fast müse trinke ^^ aja, bier oder allgmein alk isch sooo tür da! für 1 bier à 3dl zahlsch locker mal 10.-..

easy atrunke bini denn mit de Severina em Oliver und em Kevin go Hobbit luege 3D und uf imax.. womer denn di andere wieder troffe hend am 9i sinds sooo verlade gsi! aso de Werner het chum me chöne laufe, die sind denn hei.. und mit de Nicole em Jonas und em Cédi simmer denn no eis go trinke.. (d Severina hends usegeklet ^^) und de Jonas isch praktisch nuuume am lache gsi.. 😀 Ich han si denn überredet am Samstig mitzcho uf de Rangitoto, das isch en Vulkan womer vom Strand us gseht und de isch vor 700 Jahr eifach uftaucht.. vorher isch dede no nüt gsi.. es het uf jede fall mega cool tönt, d nicole isch au mitcho, aber denn am Samstig hemmer üs richtig verarscht gfühlt.. ich han nur 4.5h gschlofe gha, di andere nur 2.5h ^^ und denn simmer mit so es paar andere mal losgloffe und es het gheisse so 1.5 h laufe.. he mir sind am schluss 4.5h gloffe!! und es isch nödmal schö gsi, immer nur baum, stei, baum, stei.. ^^ d nicole, jonas, cédi und ich hend üs denn igendwenn nach 3h abghängt und sind mitm schnellste wäg zrugg gloffe.. da no es paar föteli vode highlights ^^

de jonas isch de links, d nicole die rechts, und denn no de cédi und d ramona ide mitti

 

am obig hemmer abgmacht gha mit de nicole, em cédi und em jonas zum zeme in usgang go… mir hend scho recht viel trunke, han scho 2,3 black outs.. de fründ vode ramona isch au debi gsi, de isch mega lustig! 

und igendwenn am 4i bini denn heicho und hüt bini am 8ti ufgwacht will di chline am umespringe gsi sind..

Ja, drum sötti ez langsam go pfuuse..  Guet naaaaaacht :* 

(ha huuunger 😦 vowäge mer nimmt i NZ zue, ich han bis ez ehner abgno..)

5. Januar

So, de Flug vo Frankfurt uf Shanghai hani au überlebt gha, trotz dene komische asi-dütsche rund um mich ume. I Shanghai hani denn müse 2 stund warte, s isch u e herzigi i mim alter nebet mir gsässe aber will ich befürchtet han dass si Englisch redet hani gfunde ich spriche si jetz nöd a.

Bim istige is Flugi hani denn no en Koreaner kenneglernt (wo mer nachäne no sini Nr zuegsteckt het, aber ich meld mi gläb besser nöd :D).

Bi dem Flug hani meh Glück gha, ich bin nöd igendwo zmitzt im Chueche ine ghocket sondern am Rand nebetem Robin. De Robin isch au 19ni und er het schwiiiizerdütsch chöne! :))) Isch uf jede Fall super gsi, er het mich immer schön beruhigt. Ich bin glaub währetem ganze Flug am umeschnarchle gsi, ha fast 8 vo 12 Stund gschlofe. Er mues au denkt ha, han nämmli mis Schlof-chüssi anstatt an Nacke immer füre an Hals ta, wie es ‚Halstuech‘ 😀 Isch nur bizeli schaad das er ufd Südinsle isch und erst am 15. März uf Auckland chunt (und ich gange am 16. März). Das isch mim Papi sis Bärli überem 1. Sunneufgang vo Neuseeland. u

Richtig verpeilt bini denn usgstige, und es het sooo nach Fisch gstunke! Und es isch heiss gsii, ischmer wie 35 crad vorcho, isch aber glaub nur öbbe 20 gsi.. nachde Kontrolle und eme riesige Frageboge öb ich Frücht, dreckigi Schueh (?) oder Laub debi han oder ide letschte Täg im Wald gsi bin und mit Tier Kontakt gha han hends mi denn ineloh. Frisch (bzw. nöd frisch nach 2 Täg reise) und Fröhlich bini denn am Maa mit mim Namens-Täfeli verbigloffe wo mich hetti sölle abhole.. denn hani Panik becho dass si mi vergesse hend.. und igendwenn gmerkt dass doch öbber döde isch 😀 De Chauffeur hett uf jede fall no 2 stummi Chinese mitgno und e Schwizerin, d Nicole. Han denn bizeli mit ihre gschwätzet und denn hett si gfunde: he bisch nöd du das gsi wo sich am Flughafe i Shanghai so fest gstreckt het dassd am Maa hinder dir eis an Chopf gschlage hesch? haha, uf jede Fall bini in Shanghai scho nebet ihre am Flughafe gsässe, si hetti also doch Schwizerdütsch chöne.. nachere Stund lustiger Autofahrt bini denn bi minere Familie acho.. und si sind uu herzig, voll offe und gönd voll uf eim i. S Gastmami, d Yumie isch Japanerin, e mega hübschi und e sones richtigs Mami, mega lieb halt. Und de Cleve, de Gastpapi isch mega en coole, er het uu vill Muskle und Tattoos und er isch e megamega Sportskanone! D Kiwa (10) und de Cassius (13), d Chinde sind au herzigi, aber eher bizeli uf Distanz, aso si interessieret sich nöd eso für mich.. aber isch ja ned so schlimm.

Und mis Englisch isch scho es bizeli schiiter.. ich hoff fest dass das no besser wird, momentan schämi mi jedes mal wenni was sege. Zitforme und d Verbe etc eifach voll random usgwählt, miteme meeega chline Voci.

Nachem Uspacke bini denn, nachere Spritztour durd Gegend mitm Cleve, uf Auckland sälber, das goht 20min mitm Bus und isch fast alles direkt am Meer entlang, aso voll schön! Denn bini bizeli go shoppe und d Gegend go aluege, aber eigentlich bini ufde Shoppingstrass stecke blibe 😀

Ufem Heiweg denn bini uuu fest müed worde, bim znacht (Barbecue, mmmhh…) bini fast verzschlofe.. und denn direkt is Bett.

Hüt, am Sonntig, hetts leider bizeli grägnet, aber mer het trotzdem chöne mit churze Hose umelaufe, so krass. Ich han mich mit de Nicole troffe und mer sind id Stadt go bizeli shoppe und in Subway, jaaa da gits Subway!! :)) immer bini am shoppe, eigentlich hettemer ja wöle an Strand. Es het da en sognannte Mission Bay, das isch so de lokali Strand (wo nedso überfüllt isch wie in Mallorca) und es het es paar Volleyballfälder, es sind lüüt am picknicke oder am shisha rauche und nebetdra hetts ganz vill glace-läde und es kino. und ide nacht hetts döde beach-partys. Mega cool, wie i dene ami-film!

Jetz gits denn gad Esse, Spaghetti Bolognese 🙂

2. Januar

Am 7.29 wach ich uf, ganz verschlofe und gsehne nebet mir mis Bölleli ligge.. s letschte mal drüll ich mich um, kuschle mich a ihn. Ich han denkt jetz han ich no gnueg Ziit zum mich schön verabschiede.. nüt gsi, 1 Minute und denn lüütet au scho min Wecker. Ich quäle mich usem warme, früsch azognige Bettli und gange go dusche. Dusche am Morge hani scho immer ghasst! Und denn hetts dede auno sone neui Duschwand womer immer nach jedem Dusche öbbe 5Minute mues pfläge und abdusche und streichle und abtröchne (was sich nachere 2-Minute-Duschi eindütig nöd lohnt) hani darum au nöd gmacht, hihi.

Mit mim riesige, neongälbe Koffer, mim Blüemli-Rucksack und ere risige, unpraktische Täsche bini schlussendlich uf de Bus grännt willi am 9i no en Arzttermin gha han weg mim Ohr wo sich eigentlich meh wie en verstopfte Abfluss agfühlt het. Für en Arzttermin rächnet mer ja normalerwiis 30Minute i.. oder wenns ganz schlimm chunt 1 Stund. Aber nöd 3 Stund? Ich han mer uf jede fall denkt ich gang zu dem Arzt, er seit mir es segi zwar nani guet aber flüge chani scho, het ja scho immer klappet.. isch aber bizeli andersch gloffe: “Aso si chönd entscheide, entweder mir schlitzet ihne ihres Trummelfell uf inere chline OP, dünd es Röhrli ine stecke und de ganzi Schleim absuuge.“ „oder?“ „Ja, oder ich chan si nöd Flüge loh“ Aso ich han ja nöd würklich chöne entscheide, ussert mer hetti so um di 6000.- z viel.. aber denn hetti ja es halbs Jahr für nüt gschaffet 😀 die Ironie!

„hend Sie denn vor i Neuseeland go schwümme z go?“ Ja logo, es isch Summer dete? „Will si dörfet mit dem Röhrli denn nöd go tauche go.* Ich hanmer denkt ja voll ok, tauche getraui mi e nöd.. aber mit tauche hetter leider Chopf unters Wasser hebe gmeint, ned go schnorchle.

Nach 1 Stund Gspräch, 1 Stund warte und eme richtig unnötige Hörtest hani denn d Ehr gha. Und han denn auno 20Minute Ziit gha zum Speed-Datig mit mim Papi und de Legi mache (wo eigli 2Stund iplant gsi weret).

Mitem Ramon bini denn an Flughafe, und denn isch alles zackzack gange.. und scho de letschti Kuss und das komische Gfühl wennmer hinter d Absperrig lauft (und no Skinny Love lauft, da macht alles ned besser) und mer weiss igendwie dasmer ez für so lang wäg isch.. aber eigentlich weiss mers ebe doch nöd. Es isch eifach die Ungwüssheit wo komisch isch. Ich gang ines fremds Land womer sich nöd chan vorstelle was für Lüüt das mer kennelernt oder död werdet si. Und denn no das scheiss englisch! Wennmer wüsst dassmer hei chunt nach 11 Wuche und denn gosch wieder i dis gwohnte Zimmer und dis gwohnte Lebe zrugg, oke. Aber wennmer nach fast 3 Monet ‚Fremdi‘ heichunt und denn hettmer keis Diheime womer ane go chan sondern mer zieht gad ine neui WG mit neue Lüüt, das git no biz en komische Bigschmack zum Ganze.

Bizeli Fertig vo dem Ganze bini denn in Flüger ine ghocket uf Frankfurt und han denkt dasi jetz endlich mal chan schlofe (willi am Tag vorher bis am 3 Packt han). Sobalds Abschnallzeiche cho isch bini schön ‚anegläge‘ so guets halt goht und han wöle pfüsele. Aber leider bin ich nöd mit Lufthansa sondern mit Luftkarussel greist. Ich bin ja scho gnueg gfloge dasi nöd gad Angst bechume bimene Lüftli, aber ich han mer echt Sorge gmacht obs üs jetz denn gad uf de Chopf haut. Jedi 30 Sekunde es Luftloch und uf di eint site und uf di anderi.

Und ja, Vanessa, de Frankfurter Flughafe isch echt scheisse! Nur 30Minute W-lan, huere asi? Uf jede Fall, das isch ja min 1. Langstrecke-Flug.. aber sinder schomal imene Flugi gsi wo doppelstöckig (!!) isch und trotzdem 9 Sitz pro Reihe? Wenn das Abstürzt isch das ja en Völkermord!? Nach 2 Film (Notting Hill isch ja voll super) und bizeli Schlofe und riiichtig grusigem Esse hani 6 Stund überstande vo 10. Und ich han hunger 😀